Mae’r trefniadau cyflawni ar gyfer canlyn arni â’r uwchgynllun strategol hwn ar gyfer y dref gyfan yn ganolog i’w lwyddiant cyffredinol. Mae trefniadau traddodiadol ar gyfer rheoli prosiectau, cyfrifoldebau corfforaethol a swyddogaethau statudol o fewn yr awdurdod lleol yn cyflwyno cyfres o faterion sydd y tu hwnt i gylch gorchwyl y comisiwn hwn. Mae cyflawni gweledigaeth ar gyfer tref ac nid yn unig cydgysylltu, ond perchenogi, pob agwedd ar y strategaeth yn galw am ffyrdd newydd o weithio, yn enwedig yn ystod y cyfnod presennol o newid gwleidyddol, llywodraethol ac economaidd mawr. Mae a wnelo’r cynllun hwn â chreu dyhead sy’n uno, gweledigaeth a hefyd partneriaeth.

Mae’r ddogfen hon yn nodi ystod o amcanion strategol, uwchgynllun gofodol a nifer o brosiectau gweddnewidiol ar gyfer Bae Colwyn sy’n feiddgar ac yn rhai â ffocws. Maent yn ymateb uniongyrchol i’r anghenion a’r cyfleoedd presennol yn y dref a dealltwriaeth am bob rheidrwydd economaidd a gwleidyddol a fydd yn parhau i ysgogi polisïau cartref am nifer o flynyddoedd.

• Ceidwad ac arweinydd y weledigaeth a’r uwchgynllun ar gyfer y dref. Er y bydd y themâu, y prosiectau a’r pecynnau cyllido i weithredu elfennau o’r uwchgynllun i gyd yn wahanol, rôl y ceidwad yw sicrhau cyflawni effeithiol ar draws yr ardal gyda chynnydd yn cael ei wneud tuag at y strategaeth eang.
• Cymell, arwain a chaffael pob agwedd ar fuddsoddiadau gyda ffocws arbennig ar fuddsoddi mewn tai, gwelliannau strategol i’r amgylchedd, parciau ac ardaloedd o dir y cyhoedd a buddsoddiadau allweddol sy’n gysylltiedig â chyflogaeth gan gynnwys hwyluso’r cyfle a gynigir gan y ganolfan siopa a chyllid mwy strategol ar gyfer gwaith sy’n ymwneud â chludiant, isadeiledd ac amddiffyn rhag llifogydd.
• Mynnu a thrafod y fargen orau i Fae Colwyn gyda buddsoddwyr yn y sector cyhoeddus. Bydd hyn yn digwydd yng nghyd-destun y toriadau o 25% mewn gwariant cyhoeddus o 2011-2015 (Penawdau’r Gyllideb Frys – Mehefin 2010). Mae hyn yn galw am gydweithio ar y lefelau uchaf rhwng y Cyngor, Llywodraeth Cynulliad Cymru, buddsoddwyr a phartneriaid cymunedol.
• Marchnata Bae Colwyn, gan adeiladu sylfaen fuddsoddi’r sector preifat, proffil yr ardal, ac ategu ac arwain ffocws yr holl bartneriaid.
• Darparu cysondeb o ran y dull o weithredu dros nifer o flynyddoedd, ar draws newidiadau mewn trefniadau cyllido a pholisïau.
• Dull strategol o ymdrin â chyllid a buddsoddi.

Yn ogystal â bod yn geidwad y weledigaeth, mae’n rhaid bod gan yr asiantaeth sy’n gyfrifol am gyflawni’r uwchgynllun hwn ar gyfer y dref gyfan ym Mae Colwyn gylch gorchwyl i gydblethu’r holl ffrydiau cyllid ar draws yr holl themâu a fframweithiau. O’r holl gyllidebau yn y sector cyhoeddus a chyllidebau cyflenwi gwasanaethau i’r holl raglenni cyfalaf a buddsoddiadau gan y sector preifat, un dull strategol ar gyfer Bae Colwyn fydd yr ysgogydd yma.  

Mae hanes polisïau trefol mewn trefi a dinasoedd yn y DU yn frith o arbrofion, cynlluniau peilot a mentrau trefniadol sydd wedi cael effaith o faint amrywiol ac wedi rheoli gwahanol gyfundrefnau cyllido mewn ystod o wahanol gyd-destunau. Mae’n rhaid bod a wnelo’r uwchgynllun hwn â dysgu o’r profiadau hyn a gweithredu partneriaeth cyflawni newydd sy’n gwneud i’r weledigaeth ddigwydd.

Mae’n rhaid i’r bartneriaeth cyflawni ar gyfer yr uwchgynllun strategol hwn hefyd fod â strwythur ac adnoddau i arwain y broses o ddatblygu dulliau newydd o gael cyllid gan y sector preifat, ymgysylltu â thirfeddianwyr allweddol a’r diwydiant buddsoddi.

Bydd angen dulliau creadigol ac arloesol o sicrhau cyllid gan y sector cyhoeddus a’r sector preifat er mwyn gweithredu’r llu o themâu a phrosiectau o fewn yr uwchgynllun hwn. Bydd defnydd traddodiadol o gyllid y sector cyhoeddus i ysgogi buddsoddiadau preifat a chynyddu gwerthoedd a helpu i greu mwy o farchnadoedd lleol gweithredol yn anodd. Bydd yn rhaid wrth fodelau ariannol a chyd-fentrau newydd i weithio gyda rhanddeiliaid cyhoeddus a buddsoddwyr preifat ac mae’n rhaid i’r cyfrwng cyflawni ar gyfer yr uwchgynllun gael gorchwyl i ymgymryd â’r rôl arweiniol fel buddsoddwr strategol drwy ei hawl ei hun. Bydd y corff sy’n cyflawni hefyd yn cael gorchwyl i ddiogelu buddsoddiadau a wnaed eisoes yn y dref a sicrhau bod amcanion cymdeithasol ac economaidd eang yn cael eu cyflawni.

Er mwyn sicrhau mwy o bwys, mae’r cynlluniau a’r cynigion a nodir yn y ddogfen hon yn cydymffurfio â’r amcanion, y weledigaeth, y strategaeth a’r polisïau allweddol a nodir yn y CDLl sydd wrthi’n datblygu. Nid glasbrint mo’r uwchgynllun strategol ac mae’n ddigon hyblyg i newid dros y blynyddoedd sydd i ddod wrth i fuddsoddiadau ac amodau’r farchnad amrywio.

Mae’r syniadau hyn a’r cynigion yn yr uwchgynllun wedi dod i’r amlwg yn dilyn proses o gyfranogiad cymunedol a gynhaliwyd ar ddechrau’r comisiwn. Yn awr mae angen datblygu’r broses hon ac adeiladu arni wrth i’r corff sy’n cyflawni’r strategaeth drefnu a pherchenogi ymwneud pellach gan y gymuned a mecanweithiau monitro digonol ar gyfer oes y strategaeth.

Cafodd y dull o weithredu a’r cynigion a nodir yn y ddogfen hon eu cymeradwyo gan Bwyllgor Trosolwg a Chraffu Cymunedau Conwy ar 19eg o Awst 2010. Bydd angen mwy o waith ymgysylltu gyda’r sector preifat, trigolion a busnesau fel rhan o weithredu’r cynllun.