Mae'n ofynnol i Asesiad Strategaeth Amgylcheddol edrych ar y cynlluniau eraill a rhaglenni sy'n ymwneud â'r un ardal â'r CDLl.  Diben  hynny yw adnabod y rhai y dylai'r AC a'r CDLl ddwyn i ystyriaeth er mwyn peri bod datblygiad cynaliadwy'n digwydd. 

Mae llawer dogfen arall a baratowyd gan yr awdurdod lleol ac eraill yn darparu cyd-destun i'r CDLl - yn ffurfiant yr amcanion y dylai'r CDLl gynorthwyo i'w gwireddu yn ogystal â defnyddiau atodol - i'w cael ar ffurf polisïau a rhaglenni.

Yn ychwanegol at gynlluniau a strategaethau ar y lefel leol, mae cryn arweiniad yn cael ei roi ar lunio cynlluniau datblygu ar lefel Cymru, a hynny ar ffurf Polisi Cynllunio Cymru a Nodiadau Cyngor Technegol (NCT), a Chynllun Gofodol Cymru.

Mae'n bwysig fod y CDLl a'r AC  fel ei gilydd yn dwyn i ystyriaeth y genadwri a geir yn y dogfennau hyn, gan gymryd dull unedig i ddatblygu ardal y cynllun.  Mae cynnwys y rhain yn y fframwaith amcanion cynaliadwyedd yn ffordd orau o'i dwyn i mewn i'r AC (Adran 5). 

Mae gweddill yr Adran hon yn gosod y prif gynlluniau a chanllawiau fydd yn dylanwadu ar y CDLl a'r materion hynny y dylid eu trafod, i ryw raddau wrth gloriannu pa amcanion datblygu cynaliadwy sydd wedi eu gosod ar gyfer yr ardal a sut mae gwireddu'r rheiny drwy'r CDLl.

Mae'n bwysig nodi nad yw'r rhestrau hyn i fod i gynnwys pob dim, a'u bod yn syml yn adnabod y cynlluniau a'r rhaglenni sydd yn fwyaf perthnasol i'r CDLl a'r AC.  Golyga hynny mai ond y materion sy'n uniongyrchol dan ddylanwad gweithrediad polisi'r CDLl sydd yn gynwysedig yn y crynodeb o'r dogfennau hyn.

Mae Cyfarwyddeb Cyngor y GE ar Gadwraeth o Gynefinoedd Naturiol a Fflora Gwyllt a Ffawna 92/43/EEC -   yn ystyried cadwraeth fflora a ffawna ac ar rwydwaith o fannau wedi eu gwarchod ar draws Ewrop, yn cynnwys ardaloedd o warchodaeth arbennig.

Mae  Cyfarwyddeb Fframwaith Dŵr 2000/60/EC –  yn ystyried y defnydd cynaliadwy o ddŵr a gwarchod ansawdd dŵr yn nalgylchoedd afonydd ( ni luniwyd unrhyw gynlluniau yn y DG o dan y gyfarwyddeb hon).

Mae amryw o gyfarwyddebau ynglŷn â rheoli gwastraff yn cynnwys tirlenwi 99/31/EC -  yn ceisio dull rheoli gwastraff mwy cynaliadwy, yn cynnwys gosod targedau ar gyfer graddfa ailgylchu gwastraff gydag ymhlygiadau perthnasol i bolisïau rheolaeth gwastraff cyffredinol.

Mae ‘Strategaeth Wastraff’ (2000) y DG yn gosod y weledigaeth ar gyfer sut i fynd ati i drafod  rheolaeth gwastraff yn y DG.  Mae'n cynnwys targedau er mwyn gostwng gwastraff diwydiannol a masnachol sydd yn mynd i safleoedd tirlenwi  i 85% o lefelau 1998 erbyn 2005, gan ailgylchu 30% o wastraff domestig erbyn  2010. Felly mae gofyn gwirio'r CDLl  i sicrhau ei fod yn hyrwyddo'r defnydd mwyaf effeithiol o adnoddau.

‘Ansawdd Bywyd Gwell;  Strategaeth ar gyfer datblygiad cynaliadwyedd yn y Deyrnas Gyfunol’ (1999) a'r diweddariad yn y strategaeth ‘Diogelu'r Dyfodol’ (2005) yn gosod yr agenda ddatblygu cynaliadwy ar draws y DG.

Mae'r modd y mae'r drefn ddefnydd tir  yn gallu cael ei defnyddio i gyfrannu at yr amcanion hyn hefyd yn cael ei drafod, gydag adrannau thematig yn amlinellu rhannau o bolisi cynllunio yn mynd â'r syniadau hynny yn eu blaenau. Mae 'Polisi Cynllunio Cymru' yn disgwyl i ddatblygiad cynaliadwy fod yn flaenoriaeth allweddol ar gyfer Cynlluniau Datblygu Lleol.

'Cynllun Gofodol Cymru' wedi ei ddiweddaru ydyw'r cynllun datblygu cenedlaethol i Gymru.  Mae Conwy dan ddylanwad tair is-ardal ofodol o fewn y cynllun y Gogledd-ddwyrain, y  Gogledd-orllewin ac i raddau llai'r Canolbarth. O fewn pob un mae blaenoriaethau gwahanol ac wrth gloriannu datblygu yn Sir Conwy rhaid dwyn pob un i ystyriaeth.

Y weledigaeth ar gyfer Gogledd-orllewin  - Eryri a Môn, yn y cynllun gofodol yn niweddariad 2008 ydyw:

“Amgylchedd ffisegol a naturiol o ansawdd uchel yn cynnal economi sy'n seiliedig ar wybodaeth a diwylliant, economi  fydd yn gymorth i'r ardal ei chymeriad unigryw i gadw a denu pobl ifanc yn ôl,  ac i gynnal yr iaith Gymraeg."(92)

Y weledigaeth ar gyfer Gogledd-ddwyrain  –  Y Gororau a'r Arfordir, yn niweddariad 2008 o'r cynllun gofodol ydyw:

“Ardal sy'n harneisio'r ffactorau sy'n sbarduno newid ar ddwy ochr y ffin, yn lleihau anghyfartaleddau ac yn gwella ansawdd ei h asedau naturiol a  ffisegol. '(72)

Mae diweddariad 2008 o Gynllun Gofodol Cymru yn gosod elfennau allweddol i is-ardaloedd. Y rhai mwyaf perthnasol i Gonwy yw'r rhain:

• Yr angen i ddatblygu mynediad cynaliadwy rhwng canolfannau, trefi arfordirol ac ar y ffin, a'r ardaloedd gwledig yn y sir
• Rôl yr A55 fel rhan o rwydwaith ar draws Ewrop
• Y brif ganolfan o gwmpas Llandudno, yn cynnwys tref Conwy, Llandudno, Cyffordd Llandudno, a Bae Colwyn,  yw'r gyriant economaidd allweddol i'r ardal. 
• Mae angen yng Nghonwy i ledaenu'r sylfaen economaidd i godi proffil asedau amgylcheddol y sir fel  canolbwynt  pwysig i ddarparu cyfleoedd cyflogaeth  o ansawdd uchel yn adeiladu ar gryfderau a meithrin y teimlad unigryw o le arbennig iawn.
• Mae digon, os nad mwy na digon, o dir wedi ei ddynodi ar gyfer cyflogaeth yn y cynlluniau defnydd tir, ond gall yr hyn a ddynodwyd fod yn methu â bod o'r ansawdd y chwilir amdano gan gyflogwyr, fel yr angen am unedau llai ar gyfer gwasanaethu neu gynhyrchu nwyddau o werth uwch.
• Mae Conwy, Bae Colwyn  a Llandudno yn ganolfannau twristaidd rhanbarthol, er bod peth buddsoddiad ei angen drwy'r newid yn y gofynion i drefi hamdden glan môr traddodiadol
• Mae Conwy a Llandudno yn darparu swyddogaeth  gwasanaethau manwerthu a gweinyddol pwysig i diriogaeth fawr wrth gefn.
• Mae adleoli crynhoad o swyddfeydd  Llywodraeth Cynulliad Cymru yng Nghyffordd Llandudno yn gyfle i ehangu datblygiad economaidd yn yr ardal.
• Bae Colwyn yw'r ail fwyaf o ardaloedd trefol yng Ngogledd Cymru, ond sydd heb gael buddsoddi digonol yno ac o'r herwydd mae yno ystod o broblemau cymdeithasol-economaidd yn deillio o sylfaen economaidd yn crebachu.
• Yng Nghonwy mae ystyriaethau yn deillio o bobl yn symud i'r ardal i ymddeol sy'n creu pwysau neilltuol ar gyfer cynllunio darpariaeth dai a gwasanaethau. 
• Yng Nghonwy bu datblygu tai annedd yn y gorffennol yn gyffredinol uwch na'r gofynion blynyddol, er hynny prin fod hynny wedi peri dim cynnydd yn y ddarpariaeth o dai fforddiadwy.
• Mae ffactorau'n effeithio ar ba mor fforddiadwy yw tai yn cynnwys ystyriaeth fod cyfran uchel o bobl sy'n byw a gweithio yn yr ardal gydag incwm cymharol isel, yn bennaf oherwydd cyfansoddiad strwythurol yr economi leol.
• Mae rôl  Llanrwst  yn cynnwys darparu ar gyfer twristiaeth, cyflogaeth, gweithgareddau awyr agored, manwerthu, gwasanaeth a chyflogaeth  leol sy'n cynnal ardal wledig fwy
• Mae amgylchedd naturiol o ansawdd uchel, yn cynnwys mannau gwarchodaeth natur o ddynodiad rhyngwladol ar yr arfordir ac o fewn y Parc Cenedlaethol. Mae asedau adeiledig hefyd yn cynnwys Safle Treftadaeth y Byd yn nhref Conwy.

Yr unig ‘anheddiad allweddol o bwysigrwydd cenedlaethol’ a adnabyddir yn agos i Gonwy o fewn diweddariad 2008 o Gynllun Gofodol Cymru ydyw Bangor.  Mae'r ardal union gyfagos yn cael ei hadnabod fel ardal ar gyfer datblygiad economaidd a bydd hyn yn siŵr o gael effaith ar Sir Conwy. Bydd materion cysylltiedig â chymudo i weithio yn rhai tra phwysig yma.  

Mae Llandudno yn ganolbwynt sy'n ymestyn heibio Llandudno ei hun i gynnwys Cyffordd Llandudno, Bae Colwyn  a Chonwy, ac yn cael ei adnabod yn y Cynllun Gofodol Cymru (diweddariad 2008) fel ' anheddiad traws ffiniol'. Y rheswm am hyn yw am y rôl y mae'r ardaloedd yma yn ei chwarae i Ogledd-ddwyrain, Gogledd-orllewin  a'r  Canolbarth.

Defnyddiwyd yr holl gasgliad o Nodiadau Cynghori Technegol a Pholisi i hel gwybodaeth i'r AC. Talwyd sylw arbennig ' Polisi Cynllunio Cymru' sy'n rhoi trefn y broses o lunio CDLl a gofynion arfarnu cynaliadwyedd.   Nodir isod y pwyntiau perthnasol i'r broses y dylid eu dwyn i ystyriaeth yn achos yr AC a CDLl Conwy.

Nodyn Cyngor Technegol 2: Cynllunio a Thai Fforddiadwy (2006) yn rhoi cyngor ar sut  y gellir defnyddio'r drefn gynllunio ar gyfer darparu tai fforddiadwy. Mae'n cefnogi polisi diwygiedig sy'n cael ei osod yn y MIPPS Tai (01/2006). Mae hwn yn cynnwys gofyniad newydd i osod targed ar gyfer lefel y ddarpariaeth wedi ei sylfaenu ar anghenion lleol, datgan sut mae hyn i'w gyflawni ac wedyn fonitro'r gweithredu.

Nodyn Cyngor Technegol 4: Adwerthu a Chanol Trefi, (1996), yn rhoi cyngor ymarferol ar ffurfio polisi ar gyfer canol trefi a manwerthu yn cynnwys asesu angen, egwyddorion cyffredinol a safon meysydd parcio.

Nodyn Cyngor Technegol 5: Cadwraeth Natur a Chynllunio, (1996), ceir yma gyngor manwl ar warchod  a dynodi Ardaloedd Gwarchodaeth Arbennig (AGA)(SPA) ac Ardaloedd Cadwraeth Arbennig (ACA) (SAC). Mae'r nodyn hwn hefyd yn edrych ar Ardaloedd o Ddiddordeb Gwyddonol Arbennig (AODDGA) (SSSI) a Gwarchodfeydd Natur Lleol (GNLL)(LNR). Mae hefyd yn trafod gwarchod natur y tu allan i safleoedd statudol  sef Safleoedd o Bwysigrwydd i Gadwraeth Natur (SBGN)(SINC) a  Safleoedd o Bwysigrwydd Daearegol Rhanbarthol  (SBDRH) (RIGS).  Mae amddiffyn a chadw natur yn gyffredinol hefyd yn cael ei drafod yn y nodyn hwn.

Nodyn Cyngor Technegol 6, Amaeth a Datblygu Gwledig (2000),  yn amlinellu polisi ac arweiniad  mewn mannau gwledig yn arbennig parthed materion economaidd amaethyddol a gwledig.   Mae'r nodyn yn cynnwys arweiniad ar ddatblygu fferm ac arallgyfeirio, ailddefnyddio a rhoi defnydd newydd i adeiladau gwledig, coedwigaeth a datblygiadau yn ymwneud â cheffylau.

Nodyn Cyngor Technegol 12, Dylunio, (2002),  yn cynnwys cyngor o bwys ar sawl agwedd ar ddylunio adeiladau trefol.  Mae'r nodyn yn trafod ystod helaeth o faterion o werth i gynaliadwyedd cyffredinol gan gynnwys; dylunio cynhwysol, cludiant a symud, tirwedd, bioamrywiaeth, adfywio trefol, ystyriaethau cyhoeddus, adeiladau cyhoeddus, celfyddyd gyhoeddus, yr amgylchedd hanesyddol, dylunio tai a'u ffurfiant, mannau cyflogaeth a masnachol, ardaloedd gwledig, adeiladau darbodus ar adnoddau, dylunio a diogeled cyhoeddus.

Nodyn Cyngor Technegol 14,  Datblygiad Arfordirol, (1998).  Yn hyrwyddo datblygu cynaliadwy wedi ei ddylunio'n dda ar gyfer mannau ar yr arfordir.

Nodyn Cyngor Technegol 15, Datblygiad a  Risg Llifogydd, (2004). Mae hwn yn darparu arweiniad i awdurdodau mewn perthynas â datblygiad a llifogydd, yn cynnwys yr angen i ystyried effeithiau newid hinsawdd a'r defnydd o fapiau Risg Llifogydd.

Nodyn Cyngor Technegol 16 Chwaraeon a Hamdden, (1998), yn amlinellu diogelu'r ddarpariaeth a datblygu chwaraeon a chyfleusterau hamdden drwy'r drefn gynllunio

Nodyn Cyngor Technegol 18, Cludiant, (1998), yn rhoi cyngor manwl ar bolisïau a gweithdrefnau ynglŷn â chynllunio a thrafnidiaeth ac ynglŷn ag isadeiledd newydd. Mae ynddo arweiniad ar gerdded, beicio, yn ogystal â chamlesi a thrafnidiaeth gyhoeddus.

Nodyn Cyngor Technegol 20, Y  Gymraeg -  Cynlluniau Datblygu Unedol a Rheolaeth Gynllunio, (2000), yn annog awdurdodau cynllunio i ddwyn ystyriaeth lawn o effeithiau cynlluniau ar y Gymraeg, yn arbennig hysbysebu a rheolau eraill a allai gael effaith ar y ddarpariaeth i hyrwyddo'r Gymraeg.

Nodyn Cyngor Technegol 21, Gwastraff (2001), yn rhoi ar wybod y darpariaethau y dylid eu gwneud ar gyfer cynllunio gwastraff  a rheolaeth gynaliadwy o wastraff, yn cefnogi Strategaeth Wastraff Cymru. Mae hwn yn defnyddio egwyddorion agosrwydd a hunan-ddigoni, a blaenoriaethu rheolaeth gwastraff o dan drefn hierarchaeth trafod gwastraff gyda gostwng gwastraff yn flaenoriaeth a'i waredu'n ddewis salaf a lleiaf delfrydol. 

Nodyn Cyngor Technegol ar Fwynau, Agregau (2004), yn amlinellu'r modd y dylid trafod cynllunio ar gyfer agregau crai, gwastraff mwynau  ac agregau eilaidd/ wedi eu hailgylchu. Yr amcan cyfannol ydyw 'sicrhau fod cyflenwad yn cael ei reoli mewn modd cynaliadwy fel bo'r cydbwysedd  rhwng ystyriaethau amgylcheddol, economaidd a cymdeithasol yn cael ei gadw,  tra byddid yn sicrhau fod effeithiau ar fwynderau amgylcheddol drwy unrhyw echdynnu angenrheidiol yn cael ei gadw at lefel sy'n osgoi peri niwed dangosadwy i fuddiant o bwysigrwydd cydnabyddedig.’

Gweledigaeth y Strategaeth Gymunedol i Gonwy yw,

“Lle o harddwch naturiol, cymuned ddiogel sy’n gofalu am ei phobl, sydd ag uchelgais ar gyfer y dyfodol

Mae'r weledigaeth yn cael ei chefnogi gan bedair egwyddor arweiniol sef:

• Conwy Deg a Chynhwysol - dylai pawb deimlo'n rhan o gymuned  Conwy waeth beth yw eu sefyllfa bersonol na dewisiadau personol
• Hunaniaeth Gymdeithasol a Diwylliannol –  Mae pobl Bwrdeistref Sirol Conwy  yn falch o'i diwylliant ac yn dymuno'n arbennig i barhau i warchod a datblygu'r Gymraeg
• Amddiffyn y Dyfodol -  wrth gyflenwi anghenion y genhedlaeth bresennol dylem wneud hynny heb beryglu gallu'r cenedlaethau a ddaw i wneud yr un modd
• Gwybodaeth, Ymwneud  a  Grymhau - mae pobl yng Nghonwy eisiau cael  y wybodaeth i fedru cymryd rhan weithredol yn hyrwyddo lles y sir i'r dyfodol

Mae dull gweithredu strategaeth gymunedol wedyn yn cael ei osod mewn pum prif thema: Iechyd, Ffyniant,  Cymunedau Diogel, Amgylchedd o Ansawdd a Chreadigrwydd. Bydd peth perthynas rhwng  nod y  rhan fwyaf o is-amcanion y Strategaeth Gymunedol gydag amcanion cynaliadwyedd, gyda chyfeirio penodol at y defnydd o dir a materion cynaliadwyedd, dyma'r pum brif thema;

• Lle Iach; gall cynllun defnydd o dir annog chwaraeon a gweithgareddau drwy  hybu a gwarchod mannau agored. Mae gan gynllunio defnydd tir hefyd rôl hanfodol i chwarae i ddarparu tai fforddiadwy
• Conwy Ffyniannus; mae'r cynllun lleol yn medru helpu creu cymysgedd o safleoedd cyflogaeth mewn mannau da hygyrch yn ogystal â  gwarchod safleoedd cyflogaeth presennol rhag defnydd tir o werth uwch. Gall y cynllun hefyd helpu creu cyfran uwch o ynni o ffynonellau cynaliadwy. Drwy'r polisi gall y cynllun hefyd sicrhau cyfleoedd buddsoddi  mewn isadeiledd newydd.
• Cymunedau Cadarn a Diogel; drwy ddylunio datblygiadau newydd yn dda a gwella datblygiad eisoes yn bod, gellir gostwng troseddau, lleddfu'r ofn fod troseddu am ddigwydd a lleihau damweiniau. 
• Amgylchedd o Safon; gall y cynllun lleol gynorthwyo gwarchod a meithrin yr amgylchedd naturiol ac adeiledig. Mae gan y cynllun lleol hefyd rôl i chwarae i gynyddu'r swm o wastraff sy'n cael ei ailgylchu a datblygu celf.
• Annog Dysg a Chreadigrwydd; gall cynllun defnydd tir gael peth effaith ar yr amcan yma drwy sicrhau mynediad i gyfleoedd dysgu a sicrhau cyfraniadau at addysg lle bo'n berthnasol.

Mae ‘Strategaeth Adfywio Conwy’ yn dangos y cyfeiriad a'r weledigaeth i ardal y cynllun hyd at 2015. Mae'r Strategaeth yn dilyn yn ei blaen o'r Strategaeth Gymunedol. Mae gan y Strategaeth Adfywio gyswllt uniongyrchol i gynaliadwyedd a'r Cynllun Lleol.

Mae'r ffocws ar dwf economaidd,  adfywio, a chreu cymunedau cydlynol. Gall y cynllun lleol gefnogi'r Strategaeth drwy sicrhau cyflenwad da o dir addas i gyflogaeth a datblygiad eraill.  Mae gwelliannau isadeiledd hefyd  yn rhan allweddol o Strategaeth Adfywio.

Mae ‘Strategaeth Ddatblygu Gogledd Cymru ’ (2004), a gynhyrchwyd gan Fforwm Economaidd Gogledd Cymru, yn edrych ar Ogledd Cymru i gyd ar lefel economaidd. Mae nifer o'r egwyddorion yno yn gyffelyb o ran natur i'r rhai a geir yn y Strategaeth Adfywio.  Mae'r pwyslais yn cael ei roi ar dwf busnes newydd ac entrepreneuriaeth.

“gryfhau'r teimlad unigryw o le arbennig, gwella ansawdd adnoddau twristiaid yng Ngogledd Cymru a gostwng tymoroldeb ar draws yr ardal”

Mae'r strategaeth  hon yn cynnwys cryfhau rôl a chymhathu Trefi Arfordir Gogledd Cymru sef Llandudno, Bae Colwyn  a'r  trefi hamdden cyfagos fel y dref hamdden glan môr flaenaf a chanolfan gynadleddau yng Nghymru.

Oddi wrth yr arfordir mae  Betws-y-coed a'r ardal yn un o'r pedair ardal dwf dwristaidd (ADD) (TGA) yng Ngogledd Cymru.  Prosiectau allweddol yma yw nifer o welliannau mynediad i feiciau a cherddwyr, sefydlu Llanrwst  fel porthfan i feicio mynydd, gwella arwyddion a datblygu atyniad / crefft / manwerthu.

Mae cynllun defnydd tir gyda rhan i chwarae yng ngweithrediad y strategaethau drwy ddarparu digon o faint o dir a gwell ansawdd ardaloedd drwy bolisi.

Mae  ‘Cynllun Gwastraff Rhanbarthol Gogledd 2003-2013’ wedi ei gytuno arno gan y Cynulliad Cenedlaethol a'r awdurdodau cynllunio yng Ngogledd Cymru.  Mae'r cynllun gwastraff yn amcanu at ddarparu fframwaith cynllunio defnydd tir i alluogi i awdurdodau gwastraff unigol yn y rhanbarth ddynodi safleoedd ar gyfer cyfleusterau rheoli gwastraff. Mae'r strategaeth hefyd yn anelu at drafod  gwastraff fel  ‘adnodd’ drwy gydnabod cyfleoedd ailgylchu a chompostio.  Mae'r cynllun gwastraff wedi cael ei adolygiad cyntaf gyda drafft wedi ei gymeradwyo fis Mawrth 2008. 

“Darparu Fframwaith Cynllunio defnydd tir ar gyfer rheolaeth gynaliadwy o wastraff ac adfer adnoddau yng Ngogledd Cymru gyda'r amcanion a ganlyn:

lleihau effaith niweidiol ar yr amgylchedd a iechyd pobl

lleihau effaith niweidiol cymdeithasol ac economaidd a gwneud y mwyaf o gyfleoedd cymdeithasol ac economaidd

gwireddu anghenion  cymunedau a busnesion

bod yn unol â gofynion deddfwriaethol, targedau, egwyddorion  a polisïau a osodwyd gan fframweithiau polisi cenedlaethol  Ewropeaidd,”

Mae ‘Strategaeth Dai Lleol’ bresennol Conwy  wedi ei chynllunio i drafod materion tai gyda phwyslais arbennig ar dai fforddiadwy yn y sir.  Y prif amcanion defnydd tir yw; cynyddu'r cyflenwad o dai fforddiadwy, gwneud y mwyaf o bwerau cynllunio i gyflawni hyn; y ddarpariaeth o dai gwledig; datblygu polisi sipsiwn neu deithwyr; hybu datblygiad tai cynaliadwy; darparu mwy o lety mewn hosteli.

Fel yn achos awdurdodau eraill yng Nghymru, Yr Alban a Lloegr, cynhyrchodd  Conwy Gynllun Gweithredu Bioamrywiaeth (CGB) (BAP).  Y prif ymhlygiadau tir perthnasol i hwn yw; trafod y galw am ddatblygu a dal i amddiffyn bioamrywiaeth; annog dulliau cludiant mwy cynaliadwy; gwarchod a gwella cynefinoedd ac ecosystemau gwyllt a lled-wyllt; creu cynefinoedd newydd; sicrhau nad yw polisïau’n difrodi bioamrywiaeth leol.